Ályktun Archives - Friður.is

Ályktun vegna innrásar Ísraelshers í Rafah

Í ljósi þess að Ísraelsher hefur hafið innrás í Rafah þar sem ein og hálf milljón Palestínumanna hefst við áréttar miðnefnd Samtaka hernaðarandstæðinga kröfu landsfundar um tafarlaust vopnahlé á Gasa og ákall til íslenskra stjórnvalda um aðgerðir til að knýja það fram. Árásirnar ógna lífi óbreyttra borgara, þar á meðal hundruða þúsunda barna og hafa nú þegar komið í veg fyrir streymi lífsnauðsynlegra hjálpargagna sem voru af skornum skammti fyrir.

Í ljósi þess að Ísrael hefur hafnað friðarsamkomulagi við Hamas og ráðist á Rafah þrátt fyrir viðvaranir allra helstu alþjóðastofnanna og bandamanna sinna verður alþjóðasamfélagið og Ísland að senda kröftug skilaboð.

Ísland verðu að krefjast tafarlauss vopnahlés og mannúðaraðstoðar til að forða frá enn frekara mannfalli. Til að fylgja því eftir verða íslensk stjórnvöld að beita sér fyrir því á vettvangi Sameinuðu Þjóðanna að hernaður Ísraelsríkis á Gasa verði úrskurðaður brot á alþjóðalögum og hvetja til þess að Alþjóðaglæpadómstóllinn kæri ráðamenn í Ísrael fyrir stríðsglæpi. Ísland á jafnframt að setja viðskiptabann á Ísrael og fyrirtæki sem styðja hernaðinn á Gasa og beita sér fyrir því að önnur ríki geri hið sama. Í framhaldi ætti að lýsa því yfir að hernaðarlegur stuðningur, vopnasala og vopnaflutningar til Ísraels verði taldir samsekt með stríðsglæpum.

Í kjölfarið ættu íslensk stjórnvöld að hvetja báða aðila til áframhaldandi friðarsamninga sem miða að lausn gísla beggja aðila og varanlegu friðarsamkomulagi sem tryggir öryggi og frelsi beggja þjóða.

11/05/2024

Ályktun SHA um þingsályktunartillögu um stefnu um stuðning Íslands við Úkraínu 2024–2028.

By Guttormur ÞorsteinssonÁlyktun, Í brennidepli

Utanríkisráðherra hefur lagt fyrir Alþingi þingsályktunartillögu um stefnu um stuðning Íslands við Úkraínu 2024–2028, sem allt stefnir í að senn verði samþykkt á Alþingi.

Í þessarri stefnu felst sú kúvending á stefnu Íslands að hverfa frá því að taka ekki beinan þátt í styrjöldum með fjármögnun eða öðrum hernaðarstuðningi. Þótt þessi stefna sé nú fyrst borin upp á Alþingi, eru fulltrúar Íslands búnir að fylgja henni í raun og kom það m.a. fram í samþykkt yfirlýsinga á leiðtogafundi NATO í Vilníus í júlí 2023, þar sem samþykkt var margvísleg hernaðarþátttaka í stríðinu í Úkraínu. Þá er þegar í fjárlögum fyrir árið 2024 gert ráð fyrir 1 milljarðs kr. efnahags- og mannúðarstuðningi við Úkraínu með vinstri hendi, en jafnframt að leggja svo með hægri hendi fram 750 milljónir til viðbótar til hernaðarstuðnings sem brýtur niður efnahag og mannslíf.

Í stefnu þessari er líka bein hvatning til íslenskra fyrirtækja um að flytja hergögn og að framleiða vörur fyrir heri. Þar á eftir eru beinar tillögur sem leiða til að hlutleysi íslensks björgunarliðs verði ógnað ef stríð geysar, með því tengja þær stríðsrekstri á þann hátt að fela Landhelgisgæslunni að þjálfa erlenda sjóliða og einnig að falast eftir búnaði frá íslenskum neyðarviðbragðsaðilum.

Í greinargerð með nýju stefnunni er vitnað til gildandi Þjóðaröryggisstefnu fyrir Ísland, þar sem sé kveðið á um að „tryggja víðtæka öryggishagsmuni Íslands með virku alþjóðasamstarfi á grundvelli alþjóðalaga og með friðsamlega lausn deilumála, afvopnun, virðingu fyrir lýðræðislegum gildum, mannréttindum og réttarríkinu, jafnrétti kynjanna og baráttu gegn ójöfnuði, hungri og fátækt að leiðarljósi.“ Hin nýja stefna slekkur á þessu leiðarljósi, því í henni er hvergi að finna neinar aðgerðir sem stefna að friðsamlegri lausn deilumála eða afvopnun, ekki einu sinni vopnahlé. Þvert á móti er þar lagt til að styðja ófriðsamlega lausn.

Á Íslandi er skiljanlega ríkur stuðningur við íbúa Úkraínu eftir hernaðarinnrás Rússlands og hernám hluta Úkraínu. SHA lýsa stuðningi við að veita íbúum Úkraínu mannúðaraðstoð og að veita þeim sem hingað leita vegna stríðsins hæli meðan þess er óskað. Þá styðja SHA líka að Úkraínu verði veittur pólitískur stuðningur og einnig stuðningur til enduruppbyggingar innviða landsins með því að koma atvinnulífi, mannlífi og stjórnarháttum sem fyrst í gott horf að stríðinu loknu. SHA hafna hins vegar alfarið öllum aðgerðum og fjármögnun Íslands á stríðsrekstri í Úkraínu.

Allur sá hluti þessarar þingsályktunatillögu Alþingis og greinargerðarinnar með henni sem lýtur að þátttöku Íslands í hernaði í Úkraínu, vanvirðir bæði samþykkta þjóðaröryggisstefnu fyrir Ísland og þau gildi sem Ísland hefur haft í heiðri um að vinna að friði og taka ekki þátt í stríði. Þar er á ósvífinn hátt verið að vefja hernaðarþátttöku inn í sáraumbúðir.

28/04/2024

Ályktun landsfundar um stöðvun stríðs á Gasa

By Guttormur ÞorsteinssonÁlyktun

Landsfundur Samtaka hernaðarandstæðinga krefst þess að íslensk stjórnvöld fordæmi stríðsglæpi Ísraelsríkis og beiti sér fyrir því að komið verði á vopnahléi sem undanfara friðarsamkomulags á svæðinu. Ísland ruddi brautina í Vestur-Evrópu þegar kom að viðurkenningu á Palestínu sem sjálfstæðu ríki en hefur ekki tekið árásum Ísraelshers á Palestínumenn af nægilegri alvöru. Heilbrigðis- og menntakerfi Gasa-svæðisins hefur verið lagt í rúst, innviðir, íbúðarhús, almennir borgarar, blaðamenn og hjálparstarfsmenn eru skotmörk og lífsnauðsynlegum hjálpargögnum og matvælum er haldið frá íbúum í herkví.

Íslensk stjórnvöld hafa kallað eftir vopnahléi og hjálpað til við að bjarga dvalarleyfishöfum af svæðinu, en frekari aðgerða er þörf í ljósi þess að Ísrael hefur hundsað bindandi ályktun öryggisráðs Sameinuðu Þjóðanna um vopnahlé og mannúðaraðstoð. Ísland á að styðja við mál Suður-Afríku fyrir alþjóðaglæpadómstólnum um þjóðarmorð á Gasa og beita refsiaðgerðum gegn Ísraelskum ráðamönnum sem hafa hvatt til þjóðarmorðs og stríðsglæpa. Beita þarf viðskiptahindrunum í samræmi við vilja Palestínsku þjóðarinnar. Mikilvægt er að Ísland láti aldrei flækja sig inn í neitt form vopnasölu eða vopnaflutnings til Ísraels og beiti sér fyrir vopnasölubanni á Ísrael og þrýsti jafnframt á þau ríki sem halda áfram sölu vopna þrátt fyrir að þau séu notuð til stríðsglæpa og þjóðarmorðs.

08/04/2024

Ályktun landsfundar um úrsögn úr Nató

By Guttormur ÞorsteinssonÁlyktun

Landsfundur Samtaka hernaðarandstæðinga leggur til að 75 ára veru Íslands í Nató verði lokið með úrsögn úr bandalaginu. Það yrði viðeigandi svar við vígvæðingaræði því sem hefur heltekið Evrópu með vaxandi þunga. Evrópuríki keppast nú um að ná því takmarki að sólunda 2% þjóðarframleiðslu í vígbúnað. Þessu fé ætti að verja til annarra og þarfari málefna. Fjáraustur þessi skýrist bæði af því að Úkraínuher eru útveguð vopn í þann skelfilega skotgrafarhernað sem verið er að fórna tugþúsundum mannslífa í og einnig því að stríðið er hentug afsökun til að endurnýja vopnabúr og hlaða undir hergagnaframleiðendur.

Utanríkisráðherra Íslands gefur í skyn að auka þurfi stórlega fjáraustur Íslands í vígbúnað, og nýlegt loforð um 300 milljóna stuðning við vopnakaup Úkraínu er þáttur í því. Hingað til hefur herleysi landsins endurspeglast í því að taka ekki beinan þátt í hernaðaraðgerðum. Ljóst er að mikill þrýstingur er á að Ísland eyði meira fé innan Nató og raddir vestanhafs hafa gefið í skyn að ekki verði komið til varnar ríkjum sem borgi ekki. Ísland á hvorki að fjármagna hernað né þarf það á vígbúnaði hérlendis að halda.

Hervæðing Íslands og þátttaka í hernaði gerir Ísland að skotmarki í stórveldaátökum. Frekari vopnakaup munu ekki koma á friði eða fyrirbyggja stríðsátök. Ísland á að nýta styrk sinn sem vopnlaus og friðsöm þjóð til að beita sér fyrir friðarsamningum og sáttum. Til þess þarf Ísland að standa utan hernaðarbandalaga.

Ísland úr Nató og herinn burt!

08/04/2024

Endum stríð með friði

By Guttormur ÞorsteinssonÁlyktun

Samtök hernaðarandstæðinga mótmæla harðlega áformum íslenskra stjórnvalda um að kaupa vopn til að senda á vígvöll í öðrum löndum. Á Íslandi býr herlaus þjóð og mikilvægt er að Íslendingar stofni aldrei her. Sem þjóð án hers eru Íslendingar í kjöraðstöðu til að standa við stefnu um frið án hernaðar og vera málsvarar friðsamlegra leiða til að leysa margvíslegan ágreining víða um heim. Lengst af á þeim 75 árum sem eru frá því að Alþingi samþykkti aðild Íslands að hernaðarbandalaginu NATO, tók Ísland ekki þátt í herráði NATO og lagði því hvorki til hermenn né drápstól.

Á seinni árum hafa vígfúsir stjórnmálamenn hins vegar bætt æ meir í þátttöku Íslands í vígbúnaði og hernaðarátökum. Gróft dæmi þess var þegar íslenskir ráðherrar settu Ísland á lista yfir þjóðir sem væru viljugar til að heyja stríð í Írak. Síðan hefur Landhelgisgæslu Íslands smám saman verið blandað inn í allskyns heræfingar, sem er mjög varasöm aðgerð, þegar sjófarendur við Ísland eiga að geta treyst á hernaðarlegt hlutleysi þess mikilvæga björgunaraðila sem Landhelgisgæslan er, bæði á friðartímum og þegar stríðsógnir eru uppi. Þá eru stjórnmálamenn líka farnir að leggja til að Íslendingar leggi til hermenn í mögulegan norrænan her. Nú síðast lýsa íslensk stjórnvöld því yfir að þau ætli að fjármagna kaup á vopnum og flutning þeirra til að auka enn á stríðshörmungar í Úkraínu. Þessa þróun og stefnubreytingu er brýnt að stöðva og það strax.

Innrás Rússlands í Úkraínu er í alla staði óréttlætanleg og Samtök hernaðarandstæðinga ítreka fordæmingu sína á þeim yfirgangi. Hver dagur sem stríðið hefur staðið, hefur kostað fjölda fólks líf sitt, brotið og bramlað samfélög og spillt náttúru. Hver dagur sem stríðið mun standa áfram, mun verða framhald á sömu hörmungum. Þúsundir ungra karlmanna hafa dáið og örkumlast í þessu stríði og nú er verið að sækja ungar konur til að falla í þessum vonlausu skotgröfum líka. Þessu galna stríði lýkur ekki með „sigri“ á vígvöllum, áframhaldandi stríð í Úkraínu mun bara versna. Eina lausnin á þessu stríði er tafarlaust vopnahlé og friðarviðræður í kjöfarið. Það er skylda okkar Íslendinga að standa föstum fótum sem herlaus þjóð og beita okkur fyrir friðsamlegri lausn á stríðinu í Úkraínu.

26/03/2024

Ályktun um frystingu á aðstoð við Palestínu

By Guttormur ÞorsteinssonÁlyktun, Í brennidepli

Miðnefnd Samtaka hernaðarandstæðinga fordæmir þá ákvörðun utanríkisráðherra Íslands að frysta greiðslur til Palestínuhjálpar Sameinuðu þjóðanna. Það er óásættanlegt með öllu að beita neyðaraðstoð við sveltandi og deyjandi fólk sem pólitísku refsitæki líkt og gert er í þessu máli. Neyðaraðstoð verður að halda áfram að berast til Gaza án nokkurrar tafar.

Tilraunir ísraelskra stjórnvalda til að spyrða Sameinuðu þjóðirnar og stofnanir þeirra við hryðjuverk verður að skilja í ljósi nýfallins úrskurðar Alþjóðadómstólsins í Haag sem felur í sér áfellisdóm yfir framferði Ísraelsmanna á Gaza undanfarnar vikur og mánuði.

Úrskurðurinn kveður sérstaklega á um að hleypa verði mannúðaraðstoð inn á Gaza. Ákvörðun utanríkisráðherra gengur þannig í berhögg við niðurstöðu Alþjóðadómstólsins og hana verður að draga til baka.

28/01/2024

Áskorun um frið á Gaza

By Guttormur ÞorsteinssonÁlyktun, Í brennidepli

Samtök hernaðarandstæðinga krefjast þess af ríkisstjórn Íslands að hún beiti sér fyrir því að tafarlaust verði gert vopnahlé í stríði því sem nú geysar á Gaza. Íslenska ríkið stóð að samþykkt um stofnun Ísraelsríkis og hefur viðurkennt sjálfstæði Palestínu og ber því skylda til að beita áhrifum sínum til að tryggja frið og velferð íbúa beggja ríkjanna.

Stríð er glæpur. Stríðsglæpur er glæpur á glæp ofan. Engin stríð hafa verið háð án stríðsglæpa.

Allt frá fyrri heimsstyrjöldinni hefur hlutfall óbreyttra borgara hækkað í samanburði við hlutfall hermanna sem deyja í stríðum og nú eru óbreyttir borgarar og varnarlaust fólk í meirihluta þeirra sem deyja og særast í lang flestum stríðum. Varnarlaust fólk er líka í miklum meirihluta þeirra sem stríðsglæpir bitna á. Stríðið á Gaza bitnar nú alfarið á varnarlausu fólki sem hefur engan stað til að flýja á, ekkert öruggt skjól og algjöran skort á lífsnauðsynjum. Helmingur íbúa Gaza eru börn og því leiða loftárásir til fjöldamorða á börnum. Árásir hafa verið gerðar á bæði sjúkrahús og sjúkrabíla og á fólk sem er að reyna að flýja.

Samtök hernaðarandstæðinga eru friðarhreyfing. Friðarsinnar leggja ekki höfuð áherslu á hverjir hafa góðan eða vondan málstað að berjast fyrir, heldur á að mál séu leyst án hernaðar og annars ofbeldis.

Það þarf að stöðva stríðið á Gaza strax með vopnahléi. Vopnahléi þarf að fylgja eftir með friðarsamningum þar sem öllu fólki verður tryggt öryggi, mannréttindi og almennt réttlæti. Friður og réttlæti fara saman, á meðan óréttlæti og yfirgangur er stærsta uppspretta stríðs. Of lengi hafa vestræn ríki horft framhjá yfirgangi öfgafullra landránsmanna studda hersetu og hernaðarofbeldi Ísraelsríkis og kæfandi herkvínni sem Gazasvæðinu hefur verið haldið í, með endurteknum brotum á alþjóðalögum. Það hefur verið vatn á myllu þeirra afla í röðum Palestínumanna sem telja einu færu leiðina að svara í sömu mynt og framlengir þannig vítahring hefnda með ofbeldi. Veruleg hætta er á að þetta stríð leiði til enn frekari stríðsátaka og hryðjuverka, sem geri lausn stríðsins ennþá erfiðari. Nú þarf að breyta um stefnu og ná víðtækri samstöðu ríkja um að stöðva þetta stríð strax, tryggja öryggi fólks á stríðssvæðinu og vinna að friðarsamningum.

20/10/2023

Stöðvið stríðið í Úkraínu strax – semjið um frið og samvinnu í Evrópu

By Guttormur ÞorsteinssonÁlyktun

Við undirritaðir friðarsinnar á Íslandi skorum á leiðtoga evrópskra ríkja að stöðva stríðið í Úkraínu nú þegar og vinna í kjölfarið að friði og samvinnu í Evrópu.

Stríð eru óásættanleg leið til að útkljá ágreining ríkja eða hópa á milli. Evrópa getur státað af langri sögu siðmenningar og lýðræðis þar sem samvinna og þekkingarleit hafa leitt til stórkostlegra framfara. Við höfum einnig upplifað hrikalegar styrjaldir, átök, sundrungu og ofbeldi. Styrjaldir hafa aldrei leitt annað en hörmungar yfir álfuna og gera það einnig nú.

Stríðið í Úkraínu verður að stöðva tafarlaust með skilyrðislausu vopnahléi. Í kjölfarið þarf strax að ræða og semja um langvarandi frið sem er grunnur að mannréttindum og lýðræði. Friður og framfarir í Evrópu eru sameiginlegt verkefni álfunnar allrar. Þar mega þjóðarleiðtogar ekki láta sitt eftir liggja. Byrjum friðarferlið strax í dag.

1. Anna Friðriksdóttir, lyfjafræðingur, Reykjavík
2. Anna Guðmundsdóttir, friðarsinni, Reykjavík
3. Anna S Hróðmarsdóttir, Reykjavík
4. Anna Þorsteinsdóttir, þjóðgarðsvörður, Mývatnssveit
5. Árni Hjartarson, jarðfræðingur, Reykjavík
6. Ásta Steingerður Geirsdóttir, garðyrkjufræðingur og leiðsögumaður, Borgarfirði eystri
7. Auður Alfífa Ketilsdóttir, Reykjavík
8. Auður Lilja Erlingsdóttir, deildarstjóri, Reykjavík
9. Árni Daníel Júlíusson, doktor í sagnfræði, Reykjavík
10. Björgvin G. Sigurðsson, Selfossi
11. Brynhildur Björnsdóttir, fjölmiðlakona og söngkona, Reykjavík
12. Daníel E. Arnarsson, framkvæmdastjóri, Reykjavík
13. Davíð Kristjánsson, Selfossi
14. Dóra Svavarsdóttir, matreiðslumeistari og kennari, Reykjavík
15. Drífa Eysteinsdóttir, hjúkrunarfræðingur, Selfossi
16. Drífa Lýðsdóttir, Reykjavík
17. Einar Ólafsson, rithöfundur, Kópavogi
18. Elín Oddný Sigurðardóttir, félagsfræðingur, Reykjavík
19. Elísabet Berta Bjarnadóttir, Kópavogi
20. Eygló Jónsdóttir, kennari og rithöfundur, Hafnarfirði
21. Eyrún Ósk Jónsdóttir, rithöfundur, Hafnarfirði
22. Finnbogi Óskarsson, efnafræðingur, Reykjavík
23. Finnur Torfi Hjörleifsson, Borgarbyggð.
24. Friðrik Atlason, teymisstjóri, Reykjavík
25. Gísli Fannberg, Reykjavík.
26. Guðbjörg Sveinsdóttir, geðhjúkrunarfræðingur, Kópavogi
27. Guðmundur Guðmundsson, matvælafræðingur, Reykjavík
28. Guðríður Adda Ragnarsdóttir, kennari. Reykjavík.
29. Guðríður Sigurbjörnsdóttir, deildarstjóri, Reykjavík
30. Guðrún Hallgrímsdóttir, Matvælaverkfræðingur, Reykjavík
31. Guðrún Hannesdóttir, rithöfundur, Reykjavik
32. Gunnar Þór Jónsson, Skeiða- og Gnúpverjahreppi
33. Gunnlaugur Haraldsson, rithöfundur, Reykjavík
34. Guttormur Þorsteinsson, formaður Samtaka hernaðarandstæðinga, Reykjavík
35. Gyða Dröfn Jónudóttir Hjaltadóttir, sálfræðingur, Reykjavík
36. Gylfi Þorkelsson, kennari, Selfossi
37. Hallberg Brynjar Guðmundsson, nemi, Reykjavík
38. Hanna Kristín Hallgrímsdóttir, öryrki, Reykjavík
39. Haraldur Ólafsson, prófessor, Reykjavik
40. Harpa Kristbergsdóttir, aðgerðarsinni, Reykjavík
41. Haukur Jóhannsson, verkfræðingur, Kópavogur
42. Helga Kress, prófessor, Reykjavík
43. Hjalti Hugason, prófessor emeritus, Reykjavík
44. Hjörtur Hjartarson, Reykjavík.
45. Hlynur Hallsson, myndlistarmaður, Akureyri
46. Hrafnkell Tumi Kolbeinsson, sérfræðingur hjá mennta- og barnamálaráðuneyti, Reykjavík
47. Hringur Hafsteinsson, sköpunarstjóri, Garðabæ
48. Hrund Ólafsdóttir, bókmenntafræðingur og kennari, Reykjavík
49. Ingibjörg Haraldsdóttir, kennari, Reykjavík
50. Ingibjörg V Friðbjörnsdóttir, Kópavogi
51. Ingólfur Ásgeir Jóhannesson, Reykjavík
52. Ingvi Þór Kormáksson, hljómlistarmaður, Reykjavík
53. Ísleifur Arnórsson, stúdentsefni, Reykjavík
54. Jón Elíasson, sjómaður, Bolungarvík.
55. Jón Karl Stefánsson, doktorsnemi, Reykjavik
56. Júlíus K Valdimarsson, aðgerðasinni, Reykjavík
57. Kamilla Einarsdóttir, rithöfundur, Reykjavík
58. Kári Þorgrímsson bóndi Garði Mývatnssveit
59. Karl Héðinn Kristjánsson, fjölmiðlamaður, Reykjavík
60. Kristín Böðvarsdóttir, kennari á eftirlaunum, Reykjavík
61. Lowana Veal, aðgerðasinni og líffræðingur, Reykjavík
62. María Hauksdóttir Kópavogur
63. Nóam Óli Stefánsson, nemi, Reykjavík
64. Ólafur Guðsteinn Kristjánsson, íslenskukennari, Ísafirði
65. René Biasone, varaþingmaður, Reykjavík.
66. Rúna Baldvinsdóttir, öryrki, Reykjavík
67. Sanna Magdalena Mörtudóttir, borgarfulltrúi, Reykjavík
68. Sesselja Traustadóttir, framkvæmdastjóri, Reykjavík
69. Sigríður Gísladóttir, Dýralæknir, Ísafirði
70. Sigrún Skúladóttir, sjúkraliði, Reykjavík
71. Sigtryggur Jónsson Reykjavík Lífeyrisþegi.
72. Sigurður Flosason, bifreiðastjóri, Kópavogi
73. Sigurður G. Tómasson, f.v. útvarpsmaður, Mosfellsbæ
74. Sigurður Ingi Andrésson, véltæknifræðingur, Selfossi
75. Silja Aðalsteinsdóttir, bókmenntafræðingur, Reykjavík
76. Sjöfn Ingólfsdóttir, bókavörður, Reykjavík
77. Soffía Sigurðardóttir, friðarsinni, Selfossi
78. Sólveig Anna Jónsdóttir, formaður Eflingar, Reykjavík
79. Stefán Pálsson, sagnfræðingur, Reykjavík
80. Steinarr Bjarni Guðmundsson, bílstjóri, Höfn
81. Steinunn Sigþrúðardóttir Jónsdóttir, sagnfræðingur, Reykjavík
82. Svanur Gísli Þorkelsson, leiðsögumaður, Reykjanesbæ
83. Sveinn Yngvi Egilsson, prófessor, Reykjavík
84. Sæþór Benjamín Randalsson, matráður, Kópavogi
85. Tjörvi Schiöth, nemi, Reykjavík
86. Trausti Breiðfjörð Magnússon, borgarfulltrúi, Reykjavík
87. Trausti Steinsson, heimsreisumaður, Hveragerði
88. Unnur María Máney Bergsveinsdóttir, sagnfræðingur og sirkúslistakona, Ólafsfirði
89. Valgeir Jónasson, rafeindavirki, Reykjavík
90. Valgerður Bláklukka Fjölnisdóttir, þjóðfræðingur, Hafnarfirði
91. Vigdís Hlíf Sigurðardóttir, kennari, Reykjavík
92. Vilborg Ölversdóttir, Reykjavík
93. Þór Vigfússon, myndlistarmaður, Djúpavogi
94. Þóra Pálsdóttir, kennari, Kópavogi
95. Þórarinn Hjartarson, sagnfræðingur og stálsmiður, Akureyri
96. Þórarinn Magnússon, bóndi, Frostastöðum, Skagafirði
97. Þorsteinn Ólafsson, dýralæknir, Selfossi
98. Þorvaldur Örn Árnason, líffræðingur, Vogum
99. Þorvaldur Þorvaldsson, smiður, Reykjavík
100. Þuríður Backman, fv. alþingismaður, Kópavogi

16/05/2023

Ályktun miðnefndar SHA gegn þjónustu við kjarnorkukafbáta

By Guttormur ÞorsteinssonÁlyktun

Miðnefnd Samtaka hernaðarandstæðinga mótmælir harðlega þeirri ákvörðun utanríkisráðherra að auka þátttöku Íslands í hernaðarstarfsemi með því að taka upp reglubundna þjónustu við kjarnorkuknúna kafbáta í landhelgi Íslands. Sá fyrirvari sem settur er um að við komu herskipa og kafbáta „skuli virða ákvæði þjóðaröryggisstefnu Íslands um að Ísland og íslensk landhelgi sé friðlýst fyrir kjarnavopnum“, er haldslaus“. Hvaða alþjóðlegu skuldbindingar eru það sem gætu vikið frá þeirri friðlýsingu? Hvernig ætla íslensk stjórnvöld að ganga úr skugga um að þeir kafbátar sem hér fara um séu ekki búnir kjarnorkuvopnum?

Samtök hernaðarandstæðinga krefjast undanbragðalausrar friðlýsingar fyrir kjarnorkuvopnum á öllu íslensku yfirráðasvæði. Þá skal einnig bent á það að ef kafbátur sekkur í norðurhöfum, þá eru í kjarnorkuofnum hans hættuleg geislavirk efni, sem geta valdið mun alvarlegra umhverfisslysi í nágrenni Íslands en ósprungin kjarnorkuvopn. Þess vegna árétta Samtök hernaðarandstæðinga kröfur sínar um að umferð kjarnorkuknúinna farartækja um íslenska lögsögu verði bönnuð undantekningarlaust.

18/04/2023

Ályktun landsfundar um tafarlausan frið í Úkraínu

By Guttormur ÞorsteinssonÁlyktun

Landsfundur Samtaka hernaðarandstæðinga krefst þess að samið verði um vopnahlé í stríðinu í Úkraínu án tafar. Áframhald þessa stríðs stefnir í stigmögnun sem getur leitt til kjarnorkustríðs.

Við beinum því til íslenskra stjórnvalda að beita sér fyrir friðarsamningum og í framhaldi af því stuðningi við endurbyggingu Úkraínu í samstarfi við alla íbúa landsins.

03/04/2023