Miðnefnd Samtaka hernaðarandstæðinga vekur athygli á nýlegum fréttum af hollenska fyrirtækinu ECA Programs, sem virðast staðfesta að fyrirtækið hafi verið hálfgerð svikamylla, líkt og SHA benti á þegar í upphafi. Siðlaus og glórulaus áform fyrirtækisins um leiguþjónustu á orrustuþotum á Miðnesheiði leiddu þó í ljós hversu djúpstæð og rótgróin þrá ýmissa íslenskra hernaðarsinna er í að endurheimta herstöð hér á landi. Furðumargir stjórnmálamenn stukku til og fögnuðu hugmyndunum og afhjúpuðu þannig sjálfa sig.

Þráin eftir herþotunum á sér þó fleiri birtingarmyndir. Hún kemur glögglega í ljós á nokkurra mánaða fresti, þegar flugsveitum Nató-ríkja er boðið hingað til lands í reglubundnar heræfingar undir merkjum loftrýmisgæslu. SHA minna á kröfu sína um að slíkt þotuflug verði aflagt með öllu, enda tilgangurinn enginn annar en að þjálfa hermenn og angra heiðvirt fólk.

Systir Anne Montgomery, einhver kunnasta baráttukona bandarískrar friðarhreyfingar, lést á dögunum. Hún tók virkan þátt í baráttunni gegn kjarnorkuvopnum og vakti aðdáun og virðingu hernaðarandstæðinga víða um lönd.

Hér má lesa nýlegt viðtal við þessa merkiskonu af vefritinu Common Dreams.

Upp á síðkastið hefur portúgölsk flugsveit verið við heræfingar hér á landi. Meðal annars hafa farið fram lágflugsæfingar í Eyjafirði. Æfingum þessum hefur verið mótmælt af norðanmönnum eins og lesa má um hér.

SHA minna á nokkurra ára gamalt lagafrumvarp Steinunnar Þóru Árnadóttur, fv. miðnefndarkonu í SHA, sem sjá má hér. Frumvarp þetta dagaði því miður uppi í meðförum þingsins, en hefði það orðið að veruleika, hefði sveitarstjórnum á Íslandi verið veittar heimildir til að úthýsa slíkum drápsæfingum í sinni lögsögu. Brýnt er að þessi réttarbót nái í gegn.