Íslenskir friðarsinnar standa að blysför niður Laugaveginn á Þorláksmessu.
Safnast verður saman á Hlemmi og leggur gangan af stað stundvíslega klukkan 18:00. Fólk er hvatt til að mæta tímanlega. Friðargangan á Þorláksmessu er nú orðin fastur liður í jólaundirbúningi margra. Gangan í ár er sú tuttugasta og sjöunda í röðinni. Að venju munu friðarhreyfingarnar selja kyndla á Hlemmi í upphafi göngunnar.

Söngfólk úr Hamrahlíðarkórnum og Kór Menntaskólans við Hamrahlíð undir stjórn Þorgerðar Ingólfsdóttur kórstjóra tekur að vanda þátt í blysförinni sem endar með stuttum fundi á Lækjartorgi.
Þar mun Falasteen Abu Libdeh frá Palestínu halda stutt ávarp. Fundarstóri verður Arnar Jónsson leikari. Fundinum lýkur síðan með friðarsöng.

Friðargöngur verða einnig á Akureyri og Ísafirði á Þorláksmessukvöld.

Síðla árs 1999 hvöttu SHA íslensk sveitarfélög til að friðlýsa sig fyrir kjarnorku-, sýkla- og efnavopnum. Undirtektir voru almennt góðar og í árslok 2002 var þorri sveitarfélaga búinn að gera slíkar samþykktir.

Á dögunum barst Samtökum hernaðarandstæðinga staðfesting á að nýtt sveitarfélag hefði bæst í hópinn. Húnavatnshreppur varð til í ár með sameiningu Bólstaðarhlíðarhrepps, Sveinsstaðahrepps, Svínavatnshrepps, Torfalækjarhrepps og Áshrepps. Tveir fyrstnefndu hrepparnir höfðu samþykkt friðlýsingu en erindinu ýmist verið vísað frá eða ekki fengist afgreitt í hinum hreppunum þremur.

Eftir þessa samþykkt Húnvetninga eru einungis tíu íslensk sveitarfélög sem ekki hafa fallist á þetta sjálfsagða baráttumál og standa vonir til að þeim muni fækka enn á næstu vikum. Sveitarfélögin sem hér um ræðir eru:

Garðabær
Gerðahreppur
Grindavík
Grímsnes- og Grafningshreppur
Hornafjörður
Reykjanesbær
Sandgerði
Skagabyggð
Skútustaðahreppur
& Vatnsleysustrandarhreppur

Tilkynnt verður jafnóðum um gang þessara mála hér á Friðarvefnum.

Miðnefnd SHA fundar í Friðarhúsi

Hin árvissa bókmenntakynning Menningar- og friðarsamtakanna, MFÍK er ómissandi þáttur í jólaundirbúningi fjölmargra. Hún verður að venju haldin í húsnæði MÍR, Hverfisgötu 105 (á horni Snorrabrautar) laugardaginn 16. desember kl. 14.

Lesið verður úr verkum eftirtalinna höfunda:

* Vilborgar Dagbjartsdóttur
Það kallast ögurstund úr bókinni Heil brú.
Myndir Guðrúnar Hannesdóttur hanga uppi í salnum.

* Ingunnar Snædal
Guðlausir menn – hugleiðingar um jökulvatn og ást.

* Fríðu Á Sigurðardóttir
Í húsi Júlíu – Guðrún Sigfúsdóttir les.

* Einars Más Guðmundssonar
Ég stytti mér leið framhjá dauðanum.

* Guðrúnar Helgadóttur
Öðruvísi saga.

* Kristínar Steinsdóttur
Á eigin vegum.

* Kristínar Ómarsdóttur
Jólaljóð.

*Rósu Þorsteinsdóttur
Einu sinni átti ég gott : upptökur úr Árnastofnun.

* Hildar Finnsdóttur
Að opna dyr : æviminningar Guðrúnar J. Halldórsdóttur.

* Vilborgar Dagbjartsdóttur
Fjögur ljóð.

* Tónlist: Magga Stína og Kristinn H. Árnason, gítaleikari flytja lög af diskinum Magga Stína syngur Megas.

Aðventustemning. – Kaffisala.
Húsið opnar kl. 13:30 – Allir velkomnir.