Martyn Lowe, bókavörður, friðarsinni og aktívisti, verður gestur á félagsfundi SHA miðvikudaginn 26. október kl. 20 í Friðarhúsi. Hann hefur í gegnum tíðina starfað með fjölda samtaka sem berjast á sviði umhverfis- og friðarmála. Nú síðast með friðarhópi Greenpeace í Lundúnum.
Hópurinn er þessa daganna mjög til umræðu í breskum fjölmiðlum, vegna nýs njósnahneykslis sem upp er komið. Breskur lögreglumaður í dulargerfi gerðist flugumaður í hópnum og minnir málið talsvert á mál njósnarans Mark Kennedy, sem meðal annars kom að mótmælum gegn Kárahnjúkavirkjun. Fjallað er um málið í The Guardian og er Martyn Lowe meðal viðmælenda blaðsins. Hann hefur raunar fjallað nokkuð um það á bloggsíðu sinni síðustu daga.
Lowe mun meðal annars fjalla um þessi njósnamál á fundinum á miðvikudag. Allir velkomnir.
Miðvikudagskvöldið 26. október kl. 20 efna Samtök hernaðarandstæðinga til félagsfundar í Friðarhúsi. Tilefnið er koma breska róttæklingsins og friðarsinnans Martyn Lowe til landsins.
Martyn Lowe hefur áratuga reynslu af baráttu á sviði friðarmála, ekki hvað síst í þágu baráttunnar gegn kjarnorkuvopnum. Nánar má fræðast um ferilskrá hans hér.
Þótt Lowe sé kominn á eftirlaun, hefur hann sjaldan verið virkari. Um þessar mundir hefur hann t.d. sérstaklega sinnt baráttu gegn vígvæðingu í almennum vörusiglingum, sem réttlætt hefur verið með auknum sjóránum. Bloggsíða Martyns Lowe varpar ljósi á fjölbreytt áhugamál hans.
Allir velkomnir.
Opinn félagsfundur MFÍK verður í Friðarhúsi miðvikudaginn 19. október kl. 19.00. Sigríður Víðis Jónsdóttir mun mæta og fjalla um bók sína Ríkisfang: Ekkert. Bókin hefur fengið geysilega góða dóma en í henni segir Sigríður sögu átta einstæðra kvenna sem flúðu skelfilegar aðstæður í Al Waleed-flóttamannabúðunum og fengu hæli á Akranesi.
Léttur kvöldverður verður seldur á hóflegu verði (1000kall) í upphafi fundar. Húsið opnar kl. 18.30.
Vakin er athygli á þessu málþingi á vegum Reykjavíkurborgar:
Á morgun laugardaginn 15. október verður opið málþing á vegum Reykjavíkurborgar undir yfirskriftinni Málþing í þágu friðar í Hörpunni. Um þessar mundir eru 25 ár frá því að leiðtogafundurinn var haldinn í Höfða. Í tilefni tímamótanna hefur Reykjavíkurborg efnt til ýmissa viðburða þar sem sérstök áhersla hefur verið lögð á hlutverk friðarhreyfinga, friðarrannsókna og afvopnunarmála í samtímanum og í sögulegu samhengi og er málþingið liður í þeirri dagskrá.
Aðalfyrirlesari málþingsins er Dr. Rebecca Johnson. Dr Johnson er virtur fræðimaður og eftirsóttur alþjóðlegur ráðgjafi á sviði vopnaeftirlits, afvopnunar og friðarrannsókna. Hún veitir ráðgjafa- og rannsóknarstofnununni Acronym Institute for Disarmament Diplomacy forstöðu og vinnur einnig í sjálfboðastarfi fyrir frjáls félagasamtök sem berjast fyrir útrýmingu kjarnorkuvopna og réttindum kvenna. Aðrir frummælendur eru m.a. Jón Gnarr borgarstjóri og Frú Vigdís Finnbogadóttir, fyrrverandi forseti Íslands.
Í lok málþingsins verða pallborðsumræður sem Hjálmar Sveinsson, varaborgarfulltrúi stýrir. Þátttakendur í pallborði eru:
Stefán Pálsson sagnfræðingur, formaður Samtaka hernaðarandstæðinga og stjórnmálaskýrandi
Alyson Bailes, aðjunkt við stjórnmálafræðideild Háskóla Íslands
Auður H. Ingólfsdóttir, lektor við Háskólann á Bifröst
Khaled Mansour, sérfræðingur hjá Palestínuflóttamannaaðstoð Sameinuðu þjóðanna og nemandi við Alþjóðlegan jafnréttisskóla við HÍ.
Málþingið fer fram í sal í Hörpunni sem nefnist Rími og hefst klukkan 13.00
Aðgangur er ókeypis.
Samtök hernaðarandstæðinga og MFÍK efna til sameiginlegs fundar í Friðarhúsi, Njálsgötu 87, mánudagskvöldið 10. október kl. 20.
Á fundinum mun Eva Hauksdóttir, rithöfundur og aðgerðarsinni flytja erindi um þjóðernisöfgahreyfingar í Evrópu og teikn um að sambærileg öfl séu að ná fótfestu hér á landi. Erindið kallar Eva: „Nazisminn bankar bakdyramegin – Um uppgang nýnazisma á Íslandi. Helstu hreyfingar og varnir gegn þjóðernisstefnu.“ Að erindi loknu verða almennar umræður.
SHA og MFÍK
Þann 26. sept var haldinn á Akureyri aðalfundur hjá Norðurlandsdeild SHA sem jafnframt var opinn fundur um ákveðið umræðuefni: Nýja NATO og Ísland. Framsögu hafði Stefán Pálsson formaður SHA og að henni lokinn voru umræður. Stefán fjallaði einkum um „nýju stríðin“ eftir lok Kalda stríðsins, Bosníustríð, Kososvostríð, Afganistanstríð, Íraksstríð og Líbíustríð, öll nema Íraksstríð háð undir forustu NATO. Mest ræddi hann Líbíustríðið. Afstöðu Íslenskra stjórnvalda sagði hann þar vera jafn óboðlega og í Íraksstríðinu. Össur Skarphéðinsson vísar til þess að hafa haft þingmeirihluta fyrir stuðningi sínum án þess að nokkurn tíma væru greidd um hann atkvæði. Íslendingar dragast inn í ný og ný stríð án þess að vera spurðir.
Umræður urðu mjög líflegar þó að fundurinn væri fremur fámennur.
Að loknum umræðum var gerð grein fyrir starfi deildarinnar síðustu tvö ár og kosin stjórn. Hana skipa nú:
Þórarinn Hjartarson
Jósep Helgason
Guðrún Þórsdóttir
Varamenn:
Andrea Hjálmsdóttir og Kristín Sigfúsdóttir
2. október er fæðingardagur Mahatma Gandhi og hafa Sameinuðu þjóðirnar tileinkað daginn baráttunni fyrir tilveru án ofbeldis. Af því tilefni standa Samhljómur menningarheima ásamt fjölmörgum samtökum á Íslandi fyrir Mannlegu friðarmerki á Klambratúni (sjá viðfest plakat á íslensku og ensku).
Yfirskrift dagsins í ár verður: „Lærum að sporna gegn ofbeldinu innra með okkur og í umhverfinu”.
Tilgangurinn með þessum baráttudegi er að leggja áherslu á nauðsyn þess að ráðast að rótum ofbeldisins, og benda á að ofbeldi er grundvallarvandamál okkar tíma. Það er ekki aðeins líkamlegt og birtist í stríði og líkamsárásum – það birtist einnig sem efnahagslegt ofbeldi, sálrænt, trúarlegt, kynferðislegt og kynþáttabundið ofbeldi. Opin og einlæg samskipti og hin gullna regla að koma fram við aðra eins og við viljum að aðrir komi fram við okkur ætti að hjálpa okkur að vinna bug á ofbeldinu og nálgast takmark okkar um tilveru án obeldis.
Allir – samtök og einstaklingar eru hvattir til að gera þennan dag að tilefni til þess að leggja þessari baráttu lið. Samtök eru hvött til að fjalla um málið í samræmi við starfssvið sitt og einstaklingar eru hvattir til að hugsa um ofbeldið eins og það birtist bæði í umhverfi okkar og hjá okkur sjálfum í persónulegu lífi og hvernig við getum spornað gegn því.
Verkefnið er algjörlega sjálfbært, sala kyndla stendur undir framkvæmdinni og öll vinna er unnin í sjálfboðavinnu og tæki og tól eru látin í té af stuðningsaðilum sem eru m.a. Seglagerðin Ægir, Tæki.is og Mannréttindaskrifstofu Reykjavíkurborgar. Sjálfboðaliðar frá Reyjavíkurdeild Rauðakross Íslands sér hjálpa til meðal annars ef óhöpp verða í sambandi við eldinn.
Samtökin Seeds munu bjóða uppá heitt kakó og tengja m.a. leik með tilvitnunum í orð Gandhis. Að lokinni hinni formlegu athöfn munu verða ýmsar uppákomur sjálfsprottnar eða undirbúnar, t.d. munu búddistar úr félaginu SGI á Íslandi kyrja og félagar í samtökunum Við erum Litháar munu hafa táknræna athöfn um að “leggja niður vopnin” og er fólk hvatt til að koma með stíðsleikföng, byssur o.fl. sem hægt er að leggja niður.
Þátttakendum er frjálst að auglýsa daginn í fjölmiðlum ef þeir hafa fjárhag og/eða vilja til.
Þetta er 3. árið sem við stöndum fyrir þessum verkefni. Það byrjaði sem viðburður í verkefninu „Heimsganga í þágu friðar og tilveru án ofbeldis” og hefur þróast í að verða að árlegum viðburði.
Fyrsta árið var fulltrúi frá Samhljómi menningarheima aðal ræðumaður við Mannlegt friðarmerki, svo á síðast ári sendiherra Indlands og í ár verður aðal ræðumaður Harpa Stefánsdóttir frá Hernaðarandstæðingum.
Við hvetjum alla til að mæta og taka þátt í þessari friðarstund.
Athöfnin verður á Miklatúni/Klambratúni kl. 20.
AUS, ESN, FFWPU, Húmanistaflokkurinn, Ísland Panorama, Kvenfélagasamband Íslands, KSÍ, Litháísk-íslenska félagið, Við erum Litháar, Mannréttindaskrifstofa Reykjavíkurborgar, MFÍK, Salsafélag Íslands, Samhljómur menningarheima, Samtök hernaðarandstæðinga, SEEDS, SGI á íslandi, UN WOMEN, UNICEF, UPF, World Harmony Run, Society of new Icelanders, Seglagerðin Ægir, Tæki.is og Vinir Afríku.