Fjáröflunarmálsverðir Friðarhúss hafa slegið í gegn og að þessu sinni verður efnt til veislu á fullveldisdaginn, föstudaginn 1. desember.
Boðið er upp á jólahlaðborð með glæsilegum matseðli:
Matseðill:
Heimalöguð sænsk jólaskinka með karöflusalti,
gulrótar-appelsínusalati
og sinnepssósu
Heimagerð lifrakæfa (verður borin fram heit)
og heimagert rúgbrauð að hætti Systu
Karrýsíld
Bananasíld
Listakonan Alexandra Kjuregej mun koma fram á skemmtuninni.
Kræsingarnar kosta einungis 1.500 krónur. Borðhald hefst kl. 19 en húsið verður opnað hálftíma fyrr að venju.
Í kvöld, miðvikudag, verður haldinn á Hótel Borg fundur í tilefni af alþjóðlegum samstöðudegi með Palestínu. Um leið og við hvetjum lesendur til að mæta á þennan fund birtum við eftirfarandi grein eftir Svein Rúnar Hauksson, formann Félagsins Ísland-Palestína.
Ár hvert, þann 29. nóvember, er hvatt til samstöðu með baráttu palestínsku þjóðarinnar fyrir sjálfsákvörðunarrétti, að frumkvæði Sameinuðu þjóðanna. Hernám Palestínu hefur á svæðum sem nú falla undir Ísrael varað frá árinu 1948, en á Gaza og Vesturbakkanum að meðtalinni Austur-Jerúsalem hefur hernámið staðið frá árinu 1967. Ekkert hernám á síðari tímum hefur varað lengur og flóttamannavandinn sem skapaðist 1948 er sá stærsti sem veröldin hefur horft upp á.
Enn bólar ekkert á því að endir verði bundinn á hernám Palestínu. Því síður að ísraelskir valdamenn séu reiðubúnir að viðurkenna þau grundvallarréttindi sérhvers flóttamanns að fá að snúa heim aftur. Augu fjölmiðla hafa undanfarna mánuði beinst að blóðbaðinu á Gazaströnd, en minna verið gætt að byggingu aðskilnaðarmúrins sem heldur stöðugt áfram og stækkun landtökubyggða á Vesturbakkanum, en þetta hvort tveggja útilokar sjálfstæði Palestínu sem fullvalda ríkis.
Sjálfsákvörðunarréttur einskis virtur
Í almennum, lýðræðislegum kosningum 25. janúar s.l., sem fóru eins vel fram og hugsast gat við þær aðstæður sem ísraelska hernámið mótar, fengu listar Hamassamtakanna flest atkvæði eða um 44%. Þetta dugði í góðan meirihluta á löggjafarþinginu (PLC). Í framhaldi af því var mynduð meirihlutastjórn undir forystu Ismail Haniyeh, 43 ára bókmenntafræðings, sem hafði orðið helsti forystumaður Hamas á Gaza eftir morð Ísraelshers á leiðtoga þeirra, Sheik Yassin.
Viðbrögð vesturveldanna hafa verið að refsa palestínsku þjóðinni fyrir að kjósa vitlaust. Ísraelsher hóf nýja herferð gegn íbúum Gazaströnd til að ógilda kosningarnar með aftökum og fjöldamorðum. Yfir 350 manns hafa verið drepnir einungis frá því í júní, þar af meira en helmingur óbreyttir borgarar og meira en 50 börn. Hátt á annað þúsund eru særðir, margir örkumla. Sjálfákvörðunarréttur palestínsku þjóðarinnar er einskisvirtur og þjóðinni sem heild refsað fyrir kosningaúrslitin.
Hernámið veldur fötlun
Frjáls félagasamtök gegna mikilvægara hlutverki í hertekinni Palestínu en víða annars staðar. Þannig er talsverður hluti heilbrigðisþjónustunnar á hendi samtaka eins og PRCS (palestínska rauða hálfmánans), UHWC (bandalags heilsustarfsnefnda) og PMRS (palestínsku læknishjálparsamtakanna) sem Félagið Ísland-Palestína hefur stutt um árabil. Þá gegna samtök öryrkja sívaxandi hlutverki en um margt er það starf rétt að byrja. Bandalag fatlaðra í Palestínu byggir á einstaklingsaðild, enda ekki enn orðin til sjálfstæð félög einstakra hópa. Hernámið hefur bitnað á allri palestínsku þjóðinni og raunar á Ísraelum líka, en á engum eins og fólki með fötlun. Hernámið og aðgerðir Ísraelsher hafa orsakað fötlun hjá þúsundum manna, blindu, mænusköddun, eyrnardeyfu svo eitthvað sé nefnt.
Á þessum alþjóðlega samstöðudegi með réttindabaráttu palestínsku þjóðarinnar vill Félagið Ísland-Palestína beina augum fólks sérstaklega að fötluðum í hertekinni Palestínu, hvernig hernámið orsakar fötlun og gerir fólki með fötlun illmögulegt að lifa lífinu. Barátta fatlaðra gegn hernámi og fyrir réttindum og reisn kallar á stuðning okkar.
- Í tilefni dagsins er haldinn samstöðufundur á Hótel Borg í kvöld, miðvikudag kl. 20, þar sem Ziad Amro, helsti frumkvöðull blindra og fatlaðra og stofnandi Öryrkjabandalags Palestínu, er aðalræðumaður. Hann mun fjalla fjalla um áhrif hernáms á líf þjóðar, með sérstakri áherslu á fólk með fötlun. Ziad missti sjálfur sjónina af völdum hernámsins.
Sveinn Rúnar Hauksson læknir,
formaður Félagsins Ísland-Palestína
Ályktun frá landsfundi SHA, 26. nóvember 2006 um uppsögn herstöðvasamningsins:
Engum sem fylgst hefur með fréttum af hinum nýja „varnarsamningi“ sem koma á í stað hins alræmda samnings frá 1951 getur dulist að hér er ekki verið að semja um sambærilega aðstöðu Bandaríkjanna á Íslandi eða hernaðarsamstarf á sama grunni. Þeim mun meiri ástæða var fyrir ríkisstjórn Íslands að stíga skrefið til fulls og hverfa endanlega frá ofsóknarbrjálsaðri heimsmynd kaldastríðsáranna. Ríkisstjórn Íslands kaus þann kost sem var einna verstur, áframhaldandi samstarf við Bandaríkin að nafninu til þótt allt sé á huldu um eðli þess og inntak. SHA mótmæla fyrirætlunum um viðamiklar héræfingar hér á landi.
SHA mótmæla því að ekki sé notað tækifæri til að friðlýsa Ísland fyrir gereyðingarvopnum og hafna öllu hernaðarsamstarfi við ríki og hernaðarbandalög sem byggja tilvist sína á notkun slíkra vopna eða hótun um hana. Í því samhengi minna SHA á hið sjálfsagða baráttumál sitt, Ísland úr NATO.
Við hvetjum alla stjórnmálaflokka til þess að setja uppsögn hins nýja samkomulags, sem eins og áður gengur undir rangnefninu „varnarsamningur“ að grundvelli utanríkisstefnu sinnar fyrir alþingiskosningar 2007.
Ályktun frá landsfundi SHA, 26. nóvember 2006 um hernaðarsamstarf við Norðmenn:
Samtök hernaðarandstæðinga mótmæla öllum áformum ríkisstjórnarinnar um að hefja svo kallaðar „varnarviðræður“ við Noreg. Grundvöllur slíkra viðræðna er sú ranghugmynd að einhver sérstök ógn steðji að öryggi Íslands um þessar mundir sem geri það að verkum að bregðast þurfi við í fljótræði.
Þegar litið er til sögunnar þá má segja að hinar svo kölluðu „varnir Íslands“ hafi verið verkefni Noregskonungs lengur en nokkurs annars yfirvalds, eða frá 1262 til 1814. Ekkert við þá reynslu gefur tilefni til þess að þetta verkefni eigi aftur að fela Norðmönnum. Enda þótt Norðmenn hafi vissulega átt sjóhetjur eins og Tordenskjold á árum áður stuðlaði hernaður slíkra manna aldrei að meira öryggi eða betri aðstæðum íslenskrar alþýðu.
Það er hálfhjákátleg tregða við að horfast í augu við þessa staðreynd sem veldur því að ráðamenn Íslands hafa nú leiðst út í viðsjárverðar og kjánalegar viðræður um aukinn vígbúnað Norðmanna á Íslandi. Það er óheillaskref sem enn er hægt að koma í veg fyrir að verði tekið. Rök Einars Þveræings á Alþingi hinu forna gegn hugmyndum Ólafs Haraldssonar Noregskonungs um herstöð í Grímsey eiga jafn vel við gegn hugmyndum dagsins í dag um norsk hernaðarumsvif við Ísland.
Íslendingar eiga vissulega að treysta öryggi landsins, m.a. með því að tala máli friðar á alþjóðavettvangi því að öryggi er ekki einkamál einnar þjóðar heldur sameiginlegt verkefni alls mannkyns.
Ályktun frá landsfundi SHA, 26. nóvember 2006:
Landsfundur Samtaka hernaðarandstæðinga fagnar því uppgjöri sem forysta Framsóknarflokksins hefur gert við hina hörmulegu stuðningsyfirlýsingu íslenskra stjórnvalda við ólöglegan hernað og hernám Íraks undir forystu Bandaríkjanna.
Landsfundurinn skorar á Sjálfstæðisflokkinn að gera nú einnig hreint fyrir sínum dyrum og viðurkenna að rangar ákvarðanir voru teknar á röngum forsendum og á rangan hátt í þessu máli.
Hrikalegar afleiðingar stríðsins sem stuðningsaðilar þess bera sína ábyrgð á, blasa nú við heimsbyggðinni í fréttum dag hvern.
Í framhaldi af þessu skorar fundurinn á ríkisstjórn Íslands að senda frá sér yfirlýsingu þess efnis að Íslendingar séu ekki lengur á lista Bandaríkjanna yfir hínar viljugu þjóðir og hefðu aldrei átt að vera þar
Landsfundur SHA var haldinn í Friðarhúsi í dag, sunnudag. Ný miðnefnd var kjörin á fundinum og fjöldi ályktanna samþykktur. Niðurstöður fundarins verða kynntar rækilega á þessum vettvangi á næstunni.
Meðal markverðustu tíðinda má nefna að samþykkt var samhljóða að breyta nafni félagsins. Hið nýja heiti er Samtök hernaðarandstæðinga.
Góður rómur var gerður að nýja nafninu, sem talið er venjast vel og endurspegla prýðilega starf samtakanna og áherslur þeirra.