Lög Samtaka hernaðarandstæðinga.
Samþykkt á landsfundi félagsins (þá Samtaka herstöðvaandstæðinga) 16. – 17. okt. 1976, með áorðnum breytingum 1978, 1981, 1995, 1998, 2001, 2002, 2005 & 2006.
1. § Samtökin heita Samtök hernaðarandstæðinga
2. § Markmið Samtaka hernaðarandstæðinga eru að herstöðvar hér á landi verði lagðar niður, Ísland segi upp aðildinni að Nató og standi utan allra hernaðarbandalaga. Samtök hernaðarandstæðinga berjast gegn hvers kyns kjarnorkuvígbúnaði og taka þátt í alþjóðlegu friðarstarfi.
3. § Allir þeir, sem aðhyllast þessi markmið samtakanna og greiða árgjald til þeirra geta orðið félagar í Samtökum hernaðarandstæðinga, enda vinni þeir á engan hátt gegn málstað samtakanna. Félagsaðild er einstaklingsbundin.
4. § Samtökin afla sér fjár með árgjöldum frjálsum framlögum félagsmanna og annarra stuðningsmanna, svo og með útgáfustarfsemi og með sérstökum fjáröflunaraðgerðum.
5. § Landsfundur Samtaka hernaðarandstæðinga fer með æðsta ákvörðunarvald samtakanna. Hann samþykkir stefnuskrá, svo og starfsáætlun til eins árs. Landsfundur kýs 9 manna miðnefnd og 3 til vara, sem starfar í umboði hans og fer með ákvörðunarvald samtakanna milli ráðstefna. Skal kosning miðnefndar vera óhlutbundin og leynileg. Landsfundur kýs formann samtakanna. Skal kosning formanns vera óhlutbundin og leynileg. Allir félagar samtakanna eru kjörgengir og atkvæðisbærir á landsfundi. Landsfundur kjósi tvo endurskoðendur og tvo til vara til eins árs í senn. Þeir skulu ekki vera úr hópi miðnefndarmanna. Landsfund skal halda að hausti ár hvert. Til landsfundar skal miðnefnd boða með að minnsta kosti tveggja vikna fyrirvara.
6. § Miðnefnd kýs ritara og gjaldkera. Gjaldkeri miðnefndar annast reikningshald á hennar vegum og skilar endurskoðuðum reikningum til næsta landsfundar. Reikningsár samtakanna er á milli landsfunda. Allar helstu ákvarðanir miðnefndar verði tilkynntar í Dagfara.
7. § Fundur miðnefndar er ákvörðunarfær ef 9 atkvæðisbærir menn hið minnsta sækja fund. Við atkvæðagreiðslu ræður einfaldur meirihluti af 9 (þ.e. minnst 6 atkvæði) úrslitum mála og sérhver aðgerð á vegum Samtaka hernaðarandstæðinga skal hafa hlotið slíkt samþykki. Til fundar skal boðað með löglegum hætti og lögmætis hvers fundar getið í fundargerð.
8. § Heimilt er hernaðarandstæðingum að mynda starfshópa innan samtakanna sem vinni að verkefnum í samræmi við starfsáætlun landsfundar en hafi um það samstarf við miðnefnd.
9. § Samtök hernaðarandstæðinga gefa út málgagnið Dagfara. Miðnefnd hefur umsjón með útgáfu þess.
10. § Lögum þessum er aðeins heimilt að breyta á landsfundi og gildir þá einfaldur meirihluti greiddra atkvæða. Tillögur um lagabreytingar skulu hafa borist miðnefnd fyrir lok ágústmánaðar. Þær skulu fylgja fundarboði landsfundar sbr. 5.§. Breytingartillögur sem síðar koma fram má þó bera undir atkvæði með samþykki 2/3 hluta fulltrúa á landsfundi.
